週二 5月 16, 2006 4:05 pm
圖片來源: 台灣美術館-台灣前輩美術家 :李梅樹作品集(若有侵權,請速告知!)
網址:http://over.tngs.tn.edu.tw/arts/arts-00 ... 04-005.htm#
阿母兮手
阮阿母遮世人過嘎坎坎坷坷，彼雙手作過e穡頭，濟嘎算袂出來，佇遮有限兮空間，阮都大其概仔講講咧，提卡重要兮部分來講就好。
伊作囝仔兮時撙，不時愛佮阮外公入去深山林內挫樟仔，倘好提轉去焗腦。彼當撙，焗腦兮腦油攏規定愛交予日本仔， 焗腦兮空課艱苦祭掛，交予日本仔擱賣毋啥錢， 甘單會使趁寡所費來開爾爾，毋擱歹賺呷兮年代， 有好做都加減做，怹麻毋想遐濟。
等伊卡大漢矣,嫁尪生囝了後，伊少年兮尪，擱予儂穢到彼當時真恐怖兮傳染病，呼作 :「麻拉里亞」。 著彼款病會歸工發燒，一直吐兼漏屎袂止，阮阿母怹大家, 係怹大官擱娶過兮某，就係人講兮「後母 」，毋係家己親生兮囝，冇看到伊病嘎遮傷重矣，猶擱愛甘伊逐工佇赤豔豔兮日頭下腳，擔物件傯來傯去，攏毋倘好予伊歇睏，麻袂看伊赫無爽快，叫伊趕緊去予先生看，攏緊叫係甘單感冒發燒漏屎爾，誰人知影係穢到彼真得人驚兮「麻拉里亞」? 毋外久，一條當青春兮命都按呢報銷矣... 留ㄧ咧二十通歲兮某，佮ㄧ咧三歲囝仔佇世間。
紲落來，毋知講阮阿母悲哀兮命運才卜開始爾，怹彼大家看阮阿母無尪矣，都真敢苦毒伊，看到伊都共伊詈，尾矣紲定定強逼阮阿母愛去查某間仔趁，嫌講阮阿母共細漢囝佇厝呷了米，毋去趁哪會使?阮阿母甘願死麻毋願從，就按呢擋袂調怹大家兮凌遲，只好放殺幼囝，家己來離家出走...唉! 實在係真無奈兮代誌啦......
彼時撙空課真歹揣，麻無啥密工廠倘作，人介紹伊去山場共人煮飯，伊都去做，佇遐熟識到阮老爸 ，毋係按呢都好命矣，阮阿母對將來兮映望擱再ㄧ遍成空，阮老爸趁無呷擱厚性底，麻袂體貼查某人， 家己去引山場拖木馬e空課，卜兩尪仔某來做， 拖木馬係彼咧時代才有兮穡頭，挫落來兮樹箍囥佇木馬路頂懸，ㄧ咧人愛佇後壁鬥sak(推)，ㄧ咧愛不時佇頭前緊拄調咧， 袂使乎伊脫去,若無卡細膩咧，人共柴箍都會摔落去山腳 ， 係真呷力歹轉呷又擱博生命兮空課! 阮阿母彼當撙想說嫁都嫁到矣，毋順伊兮意， 尪阿某會定定起冤家，毋扎卡苦仔嘛到做!
後來山場兮空課卡少矣，都搬去卡鬧熱兮街阿路， 彼時撙，因為卜去橫貫公路拍磅坑阿係作路兮老芋仔足濟，怹偌歇睏，攏會坐車來遮消磨，阿擱有出出入入去大雪山載樹仔兮拖拉古問將司機嘛真濟，致使阮遐開嘎真濟查某間仔共酒家， 阿母都去查某間仔共儂拼掃煮飯，來維持阮歸傢伙仔兮生活。
等到大雪山兮樹仔挫卜了矣，橫貫公路嘛攏做好勢矣， 茶店仔參酒家生理都漸漸卡歹囉! 阮阿母若無揣過空課嘛袂使， 歸家夥仔大大細細都看伊呷穿，糴米攏愛共人賒， 欠帳都記佇壁頂，等有錢矣才還米店，有夠可憐矣!
等我卡密代誌阿，阮阿母都攏佇共人引衫來洗， 逐工唯天袂光都去共人提來洗，阮細漢麻係愛鬥做， 摜衫去溪仔予阮阿母洗，都係阮逐工愛做兮空課， 偌學校ㄧ歇睏都愛鬥洗衫，ㄧ桶兩桶三桶......鉛桶排歸排， 算算咧麻一二拾桶衫，予阮看嘎腳手都卜軟去..... 無知卜洗嘎啥密時撙才會攏洗好? 洗好擱愛曝衫， 曝乾都愛收起來折好勢摜去予人，按呢才算洗好， 唔扎講阮細漢攏麻佇溪邊大漢矣!
阮阿母因為環境所逼,變成真儼硬的查某人，伊彼雙手， 逐工操勞毋密停過，共人洗衫尚無麻有三十冬， 手緊bak(沾)茶箍粉煞著「悽」(台語音，手的皮膚病)， 記智內伊歸雙手攏係粗粗粗。阮家序細大漢會曉趁錢矣， 不時叫伊免做嘎遮掭，麥共人洗阿啦! 伊毋聽，麻強強卜做， 講伊閒袂調...
好佳在，伊越老越好命，真早都毋免擱為錢來操煩矣。 既馬伊猶原逐工唯三峽坐車來板橋作衫兮工廠剪線頭， 伊講按呢卡袂無聊，有時毋啥空課，趁兮工錢都無夠伊來回車錢， 按呢伊麻真歡喜，阮講了講伊都卜按呢，老大人阿係順伊卡好啦!
註解:
1. 拖木馬:
http://www.gov.tw/PUBLIC/view.php3?id=1 ... EWS&sub=51
http://www.twbbs.net.tw/191355.html
2.「麻拉里亞」: 就是「痢疾」的日本語，
此病為一種傳染性很高的腸道傳染病。
3. 傯來傯去: 奔波樣，為工作跑來跑去忙碌不停。
4. 糴米 :台語音唸~ㄉ一ㄚˇ，買米的意思。
5. 空課: 工作。
6. 茶箍粉 : 肥皂粉。
7.共 : 和 ˋ跟。
8. 詈: 漢音:ㄌ一ˋ。台語音~ㄌㄟˋ，用言語大聲斥責辱罵。
9. 儼硬 : 堅強，擔輸贏。
10.穡頭: 意思為" 田裡的工作 "，也可當 " 工作 "。 穡~音:ㄙㄜˋ台語音:ㄒ一ˋ。
11. 查某間仔 : 妓女戶。
12. 挫樟仔: 砍樟樹。
13.焗腦 : 焗樟樹提煉樟腦油。
14. 穢 : 傳染
