週二 5月 16, 2006 4:36 pm
2006年的母親節
早起6點半去李斯特瑜珈花園練習瑜珈，學員特別送兩位老師母親節雞卵糕佮一束剪絨仔花（康乃馨），感謝老師唯嘉義來到虎尾免費教阮逐家。
9點去智覺寺抄經，參加的人才10個人，頂禮拜日嘛才19個人爾。這是慧海文敎舉辦的，無濟人參加的原因真濟，主要是毋是熱門的修行法門。佛門內底，熱門的是經懺、像水陸、梁皇、水懺。愈大場，人愈濟，會當消災解厄增福報的，人就濟。反倒轉來，咧經說法的，20間揣無1間有，佛門信徒的素質，參佛陀所講的「自依止、法依止、莫異依止」，有真大的距離。
下晡搭朋友的車去台中看丈人，朋友的小妹仔欲轉去台中驚塞車，愛朋友載伊。一路平順無塞車，我參牽手先落車到病院看蹛院的丈人爸
，丈人爸輕微中風了後，就到安養院照顧。當初我是真不忍心，毋過真無奈，厝內干礁丈姆爾，欲抈丈人爸嘛無法度，閣愛灌食，家己是無辦法的。後生佇台北，嘛無意願接去照顧，不得不，才送去台中一間安養院，因為姨仔是佇彼間安養院做護士，逐家才較放心，因為有查某囝咧侍候。
有親人照顧有影加真好，問題是慢慢仔就較無去啊，丈人爸身體、記持嘛愈來愈退化，有時陣連人嘛認未出啊。前幾工發燒入院治療，一直揣無病因燒未退，姨仔敲電話去台北予舅仔，妗仔講：「遮嘛是足無閒的，無法度去啦！」姨仔決定甭共丈姆講入院的代誌，講人咧發燒就好，驚予伊操心。阮大姨仔厝裡準備欲辦喜事咧無閒，阮兜拄咧修理嘛無閒咧搬徙，姨仔上辛苦愛兩爿走，逐工舞到十點半才轉到厝
。
我原本隨欲去，姨仔講免啦，目前控制椆咧，無要緊啦，我想攏無人去敢講會得過，就利用閬縫假日趕去探望。到九樓去看丈人爸，丈人爸哼哼叫，叫歸晡叫未應，姨仔嘛趕過來，伊用熟練的跤手共丈人爸抽痰了後，閣用拉圇燒（微溫）的水共伊揉（擦）身軀，才看伊目睭展開。姨仔講來滯院目睭一直無展開過。毋過，目睭雖然展金金，共叫嘛無反應，毋知伊聽有亦無，心內真酸疼。病人若到認未出來啥人的時陣，就開始是夆放捒的時陣，會變成愈來愈無人欲來看伊，攏會講：「去看有啥乜路用，也毋捌汝一箍蕃薯！」聽著使人心寒，心內會滴血！莫怪人講「久病不孝囝」。
人講：「囡仔放尿濺過溪，中年人放尿會必叉，老人放尿滴著鞋。」人老、人病就足毋值，囡仔人是一日一日大，愈大漢愈巧氣；老大人是日一日差，愈來愈倒頹，愈來愈悾、愈擋戇，食老足無用！
看了丈人爸，聽候朋友來載，我佮牽手坐佇病院外口門邊仔的椅仔，假日大門無出入無啥人經過，牽手提鼠麴粿予我食，兩個人我二喙伊一喙（是牽手講伊愛減肥，未使食傷濟，毋是我愛較貪心大食），喙椆就配家己紮的滾水，一面看著街路的車來來去去，一面一看著棟一棟的大樓，一面講天說皇帝。
十外分鐘，朋友參怹小妹來，朋友講：「欲駛入去病院的時，看著恁翁某赫恩愛，真予人欣羨！」哈哈！唉！老翁老某有影愛較相好咧，愛互相照顧。即馬囡仔生了少，閣出外，兩個老人才會當相倚傍，上重要是身體愛顧予勇，若倒落，注定夆送入去安養院，安養院是現化老人最後的歸宿。
朋友的小妹講暗頓伊欲請，先帶阮去法鼓山台中分院參觀，法鼓山台中分院建築樸素高雅，拄欲做暗課，牽手佮朋友的小妹真歡喜去參加
，我參朋友去看冊，這爿是怹家己出版的冊佮一寡佛教文物咧流通，物件無濟。另陫彼爿有一寡細本結緣的冊，其他嘛無啥好看的，誠可惜。可能是有別位囥冊的所在，可是無人引進，嘛無人招呼坐。
暗頓佇五角船板用餐，第一個感覺真好的是，店的邊仔有大欉樹仔佮椅仔，會當予過路的人坐咧開講、約會，佇寸土寸金的都市，私人的店面肯提供公共設施真正罕得。內部的裝設、地面二樓、地下一樓，用真懸真懸的紅毛土雕塑做主要的裝璜，參鐵仔的雕塑、木雕、石雕
，空間感覺真開闊，窗仔真大片，會當看著外口的光景。主人幫我點一份素食套餐360元，食食（食物）嘛真合喙，食到飽閣有賰。
母親節我無請牽手食好料，煞無意中去予別人請，真是一個意外歡喜的母親節，今年的母親節過了真豐富。
早起6點半去李斯特瑜珈花園練習瑜珈，學員特別送兩位老師母親節雞卵糕佮一束剪絨仔花（康乃馨），感謝老師唯嘉義來到虎尾免費教阮逐家。
9點去智覺寺抄經，參加的人才10個人，頂禮拜日嘛才19個人爾。這是慧海文敎舉辦的，無濟人參加的原因真濟，主要是毋是熱門的修行法門。佛門內底，熱門的是經懺、像水陸、梁皇、水懺。愈大場，人愈濟，會當消災解厄增福報的，人就濟。反倒轉來，咧經說法的，20間揣無1間有，佛門信徒的素質，參佛陀所講的「自依止、法依止、莫異依止」，有真大的距離。
下晡搭朋友的車去台中看丈人，朋友的小妹仔欲轉去台中驚塞車，愛朋友載伊。一路平順無塞車，我參牽手先落車到病院看蹛院的丈人爸
，丈人爸輕微中風了後，就到安養院照顧。當初我是真不忍心，毋過真無奈，厝內干礁丈姆爾，欲抈丈人爸嘛無法度，閣愛灌食，家己是無辦法的。後生佇台北，嘛無意願接去照顧，不得不，才送去台中一間安養院，因為姨仔是佇彼間安養院做護士，逐家才較放心，因為有查某囝咧侍候。
有親人照顧有影加真好，問題是慢慢仔就較無去啊，丈人爸身體、記持嘛愈來愈退化，有時陣連人嘛認未出啊。前幾工發燒入院治療，一直揣無病因燒未退，姨仔敲電話去台北予舅仔，妗仔講：「遮嘛是足無閒的，無法度去啦！」姨仔決定甭共丈姆講入院的代誌，講人咧發燒就好，驚予伊操心。阮大姨仔厝裡準備欲辦喜事咧無閒，阮兜拄咧修理嘛無閒咧搬徙，姨仔上辛苦愛兩爿走，逐工舞到十點半才轉到厝
。
我原本隨欲去，姨仔講免啦，目前控制椆咧，無要緊啦，我想攏無人去敢講會得過，就利用閬縫假日趕去探望。到九樓去看丈人爸，丈人爸哼哼叫，叫歸晡叫未應，姨仔嘛趕過來，伊用熟練的跤手共丈人爸抽痰了後，閣用拉圇燒（微溫）的水共伊揉（擦）身軀，才看伊目睭展開。姨仔講來滯院目睭一直無展開過。毋過，目睭雖然展金金，共叫嘛無反應，毋知伊聽有亦無，心內真酸疼。病人若到認未出來啥人的時陣，就開始是夆放捒的時陣，會變成愈來愈無人欲來看伊，攏會講：「去看有啥乜路用，也毋捌汝一箍蕃薯！」聽著使人心寒，心內會滴血！莫怪人講「久病不孝囝」。
人講：「囡仔放尿濺過溪，中年人放尿會必叉，老人放尿滴著鞋。」人老、人病就足毋值，囡仔人是一日一日大，愈大漢愈巧氣；老大人是日一日差，愈來愈倒頹，愈來愈悾、愈擋戇，食老足無用！
看了丈人爸，聽候朋友來載，我佮牽手坐佇病院外口門邊仔的椅仔，假日大門無出入無啥人經過，牽手提鼠麴粿予我食，兩個人我二喙伊一喙（是牽手講伊愛減肥，未使食傷濟，毋是我愛較貪心大食），喙椆就配家己紮的滾水，一面看著街路的車來來去去，一面一看著棟一棟的大樓，一面講天說皇帝。
十外分鐘，朋友參怹小妹來，朋友講：「欲駛入去病院的時，看著恁翁某赫恩愛，真予人欣羨！」哈哈！唉！老翁老某有影愛較相好咧，愛互相照顧。即馬囡仔生了少，閣出外，兩個老人才會當相倚傍，上重要是身體愛顧予勇，若倒落，注定夆送入去安養院，安養院是現化老人最後的歸宿。
朋友的小妹講暗頓伊欲請，先帶阮去法鼓山台中分院參觀，法鼓山台中分院建築樸素高雅，拄欲做暗課，牽手佮朋友的小妹真歡喜去參加
，我參朋友去看冊，這爿是怹家己出版的冊佮一寡佛教文物咧流通，物件無濟。另陫彼爿有一寡細本結緣的冊，其他嘛無啥好看的，誠可惜。可能是有別位囥冊的所在，可是無人引進，嘛無人招呼坐。
暗頓佇五角船板用餐，第一個感覺真好的是，店的邊仔有大欉樹仔佮椅仔，會當予過路的人坐咧開講、約會，佇寸土寸金的都市，私人的店面肯提供公共設施真正罕得。內部的裝設、地面二樓、地下一樓，用真懸真懸的紅毛土雕塑做主要的裝璜，參鐵仔的雕塑、木雕、石雕
，空間感覺真開闊，窗仔真大片，會當看著外口的光景。主人幫我點一份素食套餐360元，食食（食物）嘛真合喙，食到飽閣有賰。
母親節我無請牽手食好料，煞無意中去予別人請，真是一個意外歡喜的母親節，今年的母親節過了真豐富。