有心---作者翠苓

[5656]

有心／翠苓　影像Ｏ.Ｍ

自彼年
好友報阮知影
倒地鈴的籽內底覕一粒心了後
每擺看著伊予恰查某仔 注１
一步一步逼甲走投無路的時
真想卜出手將恰查某仔薅〔khau1拔〕掉
予倒地鈴有一條生路通活落去

適者生存的世間有一點仔殘酷
卻是永遠存在的事實！

珍珠風颱對阮真慈悲
輕輕仔閃過去
拄好濟的雨水
叫醒路邊睏去的花草。

倒地鈴趁即陣雨水
下力舉頭湓〔bun3冒〕出來
生佇恰查某仔的頭殼頂。

佇上班經過的小路邊
一撮〔chok4〕一撮的花欉
微風輕輕仔搖弄著一粒一粒的倒地鈴
像少女掛的耳鉤輕輕搖動
真迷人

楞嚴經內底講
咱人的心
不在內、不在外

倒地鈴是修行者嗎？
據在恰查某仔侵占地盤
猶原自在。

的確無幾人知影
倒地鈴的籽．．
有心．．．．

2006/5/1

註：
１：恰查某仔：咸豐草

[常文]

倒地鈴



有心

[許居士]

有心，才會大。有心，才會活。有心， 才讀有冊。有心，才捌道理。
有心，才有情有義。有心，就愛講出喙。有心，嘛愛親手做。
有心，免驚波折。有心，就有勇氣。有心，幸福在眼前。
有心， 自然光明燦爛。祝福有心的人滿伊的善願。