2009-02-15《一年之計在於春》
圖檔
2009-02-12／5656

　　昨晚，有一個朋友講：「閣三百外工就閣過年呀！」我參另外一
個朋友洶洶聽著就大聲笑又一邊罵：「神經病！」。彼個朋友講：「
笑啥？真正是閣三百外工就閣過年啊？！」我就是感覺好笑，一年才
三百六十五工，「年」才過去幾工就講這款話，實在是有一種眛曉解
說的笑詼。

　　論真講，人生講長無長不過幾十年，講短無短抑有幾十年，一工
一工過去有時感覺日子過了真緊，尤其置無閒的時陣；有時感覺時間
過得真慢，因為閒閒無聊毋知欲做啥。幾十年的人生欲按怎利用全靠
家己安排，欲有怎樣的人生亦是全靠家己計劃、拍拚。

　　古早人講「一年之計在於春」，毋知你敢有計畫好今年欲完成的
事情？我是計畫今年將我所寫的台語文收集起來重新分類整理；這項
工揆有一點啊困難，因為早期我攏打完字貼出去就亂存，電腦經過一
再的換新重灌，有真濟文章毋知失落置佗位。阮祝福每一位好朋友，
攏會當完成今年的計畫！